বহুরূপী
শাহারা খান
ঘাট পাড়ি দিয়া কয়,
খেয়ানীরে চিনেনা।
নিজর চেষ্টায় সফল অইছে,
কেউর সাইয্য নিছেনা।
মানুষ বহুরূপী রে ভাই,
মানুষ বহুরূপী।
পরর দোষ বার করবার লাগি,
থাকে সবসময় আগুয়াইয়া।
নিজর মাঝে দোষে ভরা,
ইতা দেখেনা চউখ মেলিয়া।
মানুষ বহুরূপী রে ভাই,
মানুষ বহুরূপী।
কইলজা ভোনা খাইয়া কয়,
লবণ কম অইছে।
তনাই কুয়াইয়া রানলাম ছালম,
হক্কলতা অইলো মিছে।
মানুষ বহুরূপী রে ভাই,
মানুষ বহুরূপী।
পরর ভালা দেখলে তার,
শরীরে উঠে জ্বলা।
নীতির কথা কিচ্ছু হুনেনা,
কানে দেয়রে তালা।
মানুষ বহুরূপী রে ভাই,
মানুষ বহুরূপী।
অনর কথা হনো বইয়া,
তাল লাগাইয়া মারে।
কুচাল্লা দিয়া মাইনষর,
কত অনিষ্ট করে।
মানুষ বহুরূপী রে ভাই,
মানুষ বহুরূপী।
চিন্তা করি দেখেনা তারা,
জীবনর রইলো কয়দিন বাকী।
পানাহ চাই আল্লার কাছে,
ইজাত দুষ্ট মানুষ থাকি।
মানুষ বহুরূপী রে ভাই,
মানুষ বহুরূপী।
